واشنگٹن (آئی این پی)جہاز میں سوار مسافر کی جانب سے کورونا حفاظتی ماسک پہننے سے انکار، آدھے راستے میں ہی جہاں سے اْڑان بھری جہاز کو وہیں واپس لوٹنا پڑ گیا۔غیر ملکی خبر رساں ادارے کے مطابق امریکی ائیر لائن نے جمعرات کو میامی سے اْڑان بھری تاہم ایک مسافر کی جانب سے حفاظتی ماسک پہننے کا ضابطہ نہ ماننے پر جہاز کے عملے اور مسافر میں بدمزگی پیدا ہوئی جس کی وجہ سے جہاز کو آدھے راستے سے ہی واپس لوٹنا پڑ گیا۔129 مسافروں اور 14 عملے  کے ارکان کو لے کر روانہ ہونے والی بوئنگ 777 جب واپس میامی ایئرپورٹ آئی تو پولیس پہلے سے وہاں موجود تھی۔پولیس کے بیان کے مطابق جہاز لینڈ کرنے کے بعد ماسک نہ پہننے والے مسافر کو بغیر کسی مزید بدمزگی کے نیچے اتار لیا گیا۔تاہم امریکی حکام کی جانب سے کہا گیا ہے کہ تحقیقات کے بعد اس مسافر پر ہوائی سفر پر پابندی لگا دی گئی ہے۔