بیجنگ‘ دبئی‘ اسلام آباد (اے پی پی) نئے چینی  قمری سال کے موقع پر دنیا کی بلند ترین عمارت برج الخیلفہ چائنا میڈیا گروپ کی طرف سے تیار کردہ لائٹ شو سے رنگین ہو گئی۔ یہ عمارت گزشتہ چار برس سے نئے چینی قمری سال کا استقبال کر رہی ہے۔ جنوری سے شروع ہونے والے نئے چینی سال اور بہار کے تہوار کے موقع پر چینی عوام اور دوستوں کی خوشیاں بانٹنے کے لئے بیجنگ میں پاکستانی سفارت خانے کی عمارت کو روشنیوں اور روایتی لالٹینوں سے سجا دیا گیا ہے۔ وزیر خارجہ بلاول بھٹو زرداری نے اپنے وڈیو پیغام میں چین کے عوام کو مبارکباد دیتے ہوئے کہا ہے  میں چین کے عوام کو خرگوش کے نئے سال کی مبارکباد پیش کرتا ہوں۔ انہوں نے امید ظاہر کی کہ یہ سال پاکستان اور چین کے تعلقات کو نئی بلندیوں پر لے جائے گا۔
 چین میں پاکستان کے سفیر معین الحق نے اپنے پیغام میں دنیا بھر میں چینی دوستوں کے لئے امن، صحت، کامیابی اور خوشحالی کے لئے نیک خواہشات کا اظہار کیا۔