لاہور (سپورٹس رپورٹر) پاکستان رگبی یونین کے زیراہتمام آٹھویں سروس ٹائرز رگبی چیمپئن شپ 2023ء آج شروع ہورہی ہے۔ پاکستان رگبی یونین کے صدر چودھری عارف سعید کے مطابق سروس ٹائرز مسلسل آٹھویں ایڈیشن کو سپانسر کررہی ہے۔ سروس لیگ پاکستان رگبی کا سب سے بڑا 15 سائیڈ ٹورنامنٹ ہے جس میں مختلف ڈویژنز میں ٹیمیں حصہ لیتی ہیں۔ ڈویژن ون میں آج سے میچز پاکستان کے دو مقامات پر شروع ہوں گے۔ چار ٹاپ ٹیمیں ٹاپ ڈویژن ون میں شریک ہیں جن میں دفاعی چیمپئن اسلام آباد جنز، لاہور رگبی فٹ بال کلب لاہور ہاکس رگبی فٹبال کلب اور ڈیزرٹ کیمبل بہاولنگر شامل ہیں۔ آج اسلام آباد کے ایف ٹین رگبی گراؤنڈ میں پہلا میچ دفاعی چپمپئن اسلام آباد جنز اور لاہور ہاکس رگبی فٹبال کلب کے درمیان ہوگا۔ لیگ میں دو میچز اسلام آباد جبکہ پانچ میچز لاہور میں پاکستان رگبی اکیڈمی میں منعقد ہونگے۔