لاہور، کاغذ کی قیمت میں اضافہ ہوتے ہی درسی کتب مہنگی ہوگئیں

لاہور ( این این آئی) لاہورمیں کاپیوں، کتابوں کی قیمت میں 50فیصد تک اضافہ ہونے کے بعد والدین اور طلبہ دونوں ہی حکومت سے قیمتوں میں کمی کا مطالبہ کررہے ہیں۔تفصیلات کے مطابق کاغذ کی قیمت بڑھتے ہی درسی کتب کی قیمتوں کو بھی پر لگ گئے ہیں جبکہ نجی اسکول کے نرسری کا سلیبس 5 ہزار روپے پر پہنچ گیا ہے۔دکانوں پر گذشتہ برس آنے والا 10 ہزار روپے والا اسٹاک اب دوگنی قیمت پر پہنچ گیا ہے، دکانداروں کا کہنا ہے کہ مہنگے کاغذ کی وجہ سے کتابوں کی قیمت بڑھائی ہے۔ گذشتہ برس اڑھائی سو روپے میں ملنے والی درسی کتب اب ساڑھے 500 روپے میں دستیاب ہے۔کاپی 50روپے سے 70روپے اور رجسٹر 60روپے سے 90روپے میں فروخت ہورہا ہے۔ بی اے کا انگلش کا خلاصہ ایک ہزار روپے سے18 سو روپے پر پہنچ گیا ہے۔