خرم دستگیرنے گیپکو کے ڈیلی ویجز میٹر ریڈرز کی تنخواہوں میں اضافہ کردیا

گوجرانوالہ(نمائندہ خصوصی )وفاقی وزیر برائے توانائی انجینئر خرم دستگیر خان نے گیپکو کے ڈیلی ویجز میٹر ریڈرز کی تنخواہوں میں اضافہ کے احکامات جاری کردیئے۔گذشتہ روز وفاقی وزیر برائے توانائی انجینئر خرم دستگیر خان کیساتھ گیپکو ہائیڈرو یونین کے ریجنل چیئرمین ولی الرحمن خان کی قیادت میں یونین عہدیداروں اور ڈیلی ویجز میٹر ریڈرز نے گیپکو ہیڈ کوارٹر کیمپ آفس میں ملاقات کی اس موقع پر چیئرمین بورڈ آف ڈائریکٹر محمد شعیب بٹ بھی موجود تھے وفد نے گیپکو میں عرصہ دراز سے تعینات ڈیلی ویجز میٹر ریڈرز کی کم تنخواہوں اور دیگر مسائل سے آگاہ کیا۔جس پر وفاقی وزیر  نے تنخواہوں میں فوری اضافہ کے احکامات جاری کردیئے۔ انہوں نے کہا کہ حکومت  اپنی آئینی مدت پوری کریگی، ملک کو درپیش چیلنجز سے نمٹنے کیلئے عملی اقدامات کررہی ہے ،عمران خان نے ذاتی تسکین کیلئے پنجاب اور خیبر پختونخواہ کی اسمبلیاں توڑیں۔ملک کو ڈیفالٹ اور غیر مستحکم کرنے کی عمرانی کوششیں ناکام ہوگئیں ۔