بلاول انڈر 19 کھلاڑی، سندھ اجاڑ کر پنجاب اجاڑنے آیا ہے: احسن اقبال

شکرگڑھ (نامہ نگار) احسن اقبال کا چھمال روڈ پر جلسہ سے خطاب کرتے ہوئے کہا کہ بلاول بھٹو انڈر 19 کا کھلاڑی ہے۔ بلاول زرداری کو وارننگ دیتا ہوں کہ ہمارے قائد کا نام احترام سے لو، بلاول نے اگر زبان ٹھیک نہ کی تو ہم جواب دینا جانتے ہیں۔ بلاول بھٹوکو کہتا ہوں کہ تم پنجاب سیاست کرنا چاہتے ہو تو لاڑکانہ کا میرے نارووال سے مقابلہ کرلو۔ اگر میرا نارووال بہتر ہوا تو سیاست چھوڑ ڈو، اگر تم بہتر ہو تو میں سیاست چھوڑ دونگا، میرے قائد نواز شریف کا یہ لیول نہیں کہ انڈر ٹریننگ سے مکالمہ کرے، میں چیلنج کرتا ہوں کہ تم نے کراچی اور سندھ اجاڑ دیا ہے۔ اب پنجاب اجاڑنے آئے ہو، آئندہ نسلوں کی بقاءکیلئے ترقی کی سیاست کے ساتھ جڑ جائیں تاکہ آپ کے بچوں کا مستقبل بن سکے۔ ناروال میں ایک بھی کالج اچھا نہیں تھا۔ آج نارروال میں تین یونیورسٹیاں ہیں جہاں سات ہزار بچے بچیاں اور ان میں شکرگڑھ کی 1500 بچیاں تعلیم حاصل کر رہی ہیں۔ مسلم لیگ ن کو شکرگڑھ کے عوام کامیاب کریں، علاقہ کی تمام محرومیاں ختم کر دی جائیں گی۔