حکومت ناکامیوں پر پردہ ڈالنے کیلئے پی پی پر الزام تراشی کر رہی ہے: فائزہ ملک

لاہور( خبر نگار)پیپلزپارٹی شعبہ خواتین لاہور کی صدر و رکن پنجاب اسمبلی فائزہ ملک نے کہا ہے کہ مسلم لیگ ن اپنی ناکامیوں پر پردہ ڈالنے کیلئے ٹوپی ڈرامے کرتی رہتی ہے‘ حکمران بتائیں کہ بجلی کی لوڈ شیڈنگ کا خاتمہ‘ ڈرون حملوں کی بندش اور عوامی مسائل کا حل کب ہو گا۔ پنجاب میں کونسلر کے انتخابات غیر جماعتی بنیادوں پر کروانے کی کوشش کی گئی تو شدید احتجاج کریں گے۔ پیپلز پارٹی کی تاریخ اس بات کی گواہ ہے کہ ہم حکومت میں ہوں یا اپوزیشن میں‘ ہمیشہ جمہوریت کی مضبوطی اور غریب عوام کے مسائل کے حل کیلئے اقدامات کئے ہیں لیکن مسلم لیگ ن جب بھی اقتدار میں آتی ہے تو اپنی ناکامیوں پر پردہ ڈالنے کیلئے ماضی کے حکمرانوں پر کرپشن کے الزامات لگاتی رہتی ہے لیکن مسلم لیگ ن کی یہ فلم پرانی ہو چکی ہے اب عوام عملی اقدامات دیکھنا چاہتی ہے۔