کوٹ رادھا کشن‘ بھوئے آصل‘ کوئٹہ‘ ٹھٹھہ (نامہ نگاران+ آن لائن) ٹریفک حادثات میں سابق رکن قومی اسمبلی کے نواسوں سمیت 4 افراد جاں بحق اور 27 افراد زخمی ہو گئے۔ تفصیلات کے مطابق کوٹ رادھا کشن میں محلہ فاروقیہ کا شاہد موٹرسائیکل پر جا رہا تھا کہ مخالف سمت سے آنے والے شاہ جہاں کی موٹرسائیکل سے تصادم ہو گیا جس کے نتیجے میں شاہ جہاں اور شاہد موقع پر دم توڑ گئے جبکہ تیسرا شخص زخمی ہو گیا جسے حالت تشویشناک ہونے کے باعث لاہور منتقل کر دیا گیا۔ مظفر گڑھ میں سنجاوی کے رہائش ڈاکٹر عمران خان دمڑ اور ڈاکٹر جمیل خان دمڑ ٹریفک حادثہ میں جاں بحق ہو گئے۔ دونوں کا تعلق سنجاوی سے تھا اور سابق رکن قومی اسمبلی گل محمد دمڑ مرحوم کے نواسے تھے۔ دونوں کو سنجاوی میں سپردخاک کر دیا گیا۔ علاوہ ازیں ٹھٹھہ میں مکلی کے قریب قومی شاہراہ پر سیاحوں کی بس اور ٹرالر میں خوفناک حادثہ‘ 25 افراد زخمی ہوگئے۔ کراچی کے علاقے لیاقت آباد کے رہائشی ایک ہی خاندان کے افراد پکنک منانے ٹھٹھہ آرہے تھے کہ مکلی کے نزدیک قومی شاہراہ شورا موری کے مقام پر تیزرفتاری کے باعث سامنے سے آنے والے ٹرالر سے تصادم ہو گیا۔ حادثے کے نتیجے میں بس میں سوار ایک ہی خاندان کے 25 افراد زخمی ہو گئے۔