قومی ٹیم آئندہ ماہ شیڈول ورلڈ جوڈو چیمپئن شپ میں شرکت کرے گی

لاہور(سپورٹس رپورٹر )قومی ٹیم آئندہ ماہ جاپان میں شیڈول ورلڈ جوڈو چیمپئن شپ میں شرکت کرے گی۔ چیمپئن شپ 22 سے 28 اگست تک جاپان کے دارالحکومت ٹوکیو میں کھیلی جائے گی جس میں4کھلاڑی پاکستان کی نمائندگی کریں گے۔ دو کھلاڑی شاہ حسین شاہ اور آمنہ جاپان میں تربیت حاصل کررہے ہیں۔ شاہ حسین شاہ مائنس 100کلوگرام اور آمنہ مائنس47کلوگرام کیٹگری میں حصہ لیں گی جبکہ دیگر کھلاڑی اپنے اپنے ڈیپارٹمنٹ میں تربیت حاصل کر رہے ہیں جن میں سے 2کھلاڑیوں کا انتخاب کیا جائے گا۔ پاکستان سے 2 کھلاڑی جاپان کیلئے روانہ ہو ںگے جبکہ شاہ حسین اور آمنہ وہیں پر ٹیم جوائن کریں گے۔ انہوں نے کہا کہ میگا ایونٹ میں دنیا بھر سے نامور کھلاڑی حصہ لے رہے ہیں۔