لاہور(سپورٹس رپورٹر) فاسٹ بائولر خرم شہزاد کی 6 وکٹوں کی عمدہ بائولنگ اور پھر عمیر بن یوسف کی سنچری کی بدولت پاکستان شاہینز نے بنگلہ دیش اے کے خلاف پوزیشن مستحکم کرلی ہے۔ڈارون کے ڈی ایکس سی ایرینا میں چار روزہ میچ کے تیسرے دن پاکستان شاہینز نے دوسری اننگز 3 وکٹوں پر226 رنز بناکر ڈکلیئر کردی‘ بنگلہ دیش اے کو جیتنے کیلئے 428 رنز کا ہدف ملا ہے۔کھیل کے اختتام پر بنگلہ دیش اے نے بغیر کسی نقصان کے 20 رنز بنائے تھے۔اس سے قبل بنگلہ دیش اے نے اپنی پہلی اننگز 203 رنز 4کھلاڑی آؤٹ پر شروع کی لیکن خرم شہزاد کی عمدہ بائولنگ کے سبب وہ 63 رنز کا اضافہ کرکے 266 رنز بناکر آؤٹ ہوگئی۔خرم شہزاد نے 72 رنز دے کر6 وکٹیں حاصل کیں۔محمد علی نے دو کھلاڑیوں کو آؤٹ کیا۔پاکستان شاہینز نے پہلی اننگز میں201 رنز کی برتری کیساتھ دوسری اننگز شروع کی تو حسیب اللہ صفر اور کپتان صاحبزادہ فرحان 8 رنز بناکر آؤٹ ہوگئے ۔ عمیر بن یوسف اور مبصرخان نے تیسری وکٹ کی شراکت میں 177 رنز کا اضافہ کیا۔مبصر خان صرف پانچ رنز کی کمی سے اپنی چوتھی فرسٹ کلاس سنچری مکمل نہ کرسکے۔ ان کی 95 رنز کی اننگز میں آٹھ چوکے اور ایک چھکا شامل تھا۔عمیربن یوسف نے100 رنز ناٹ آؤٹ کی ذمہ دارانہ اننگز کھیلی جس میں 6 چوکے اور 2 چھکے شامل تھے۔عمیر بن یوسف کا یہ 50 واں فرسٹ کلاس میچ ہے جس میں انہوں نے 11 ویں سنچری سکور کی ہے۔بنگلہ دیش کو میچ جیتنے کیلئے مزید 408رنز درکار جبکہ تمام وکٹیں باقی ہیں ۔ آج میچ کا آخری دن ہے ۔