پشاور (نوائے وقت رپورٹ) مشیر اطلاعات خیبر پی کے بیرسٹر محمد علی سیف نے کہا ہے کہ بنوں واقعے پر ڈرامے باز سیاست کی ناکام کوشش کر رہے ہیں۔ایک بیان میں انہوں نے کہا کہ بعض مسترد شدہ سیاسی ڈرامے باز بنوں واقعہ پر سیاست کی ناکام کوشش کر رہے ہیں، انتشار کی سیاست کرنے والوں کے منفی عزائم سے عوام باخبر ہے، وزیر اعلیٰ خیبرپی کے بنوں کی صورتحال کو مسلسل مانیٹر کر رہے ہیں، واقعے کے فوری بعد وزیراعلی نے تمام مصروفیات چھوڑکر بنوں کے معاملات پر توجہ دی ہوئی ہے۔بیرسٹر ڈاکٹرسیف نے کہا کہ بنوں میں کسی بڑے ناخوشگوار واقعے کی روک تھام صوبائی حکومت کی اولین ترجیح رہی، بنوں انتظامیہ مسلسل وزیر اعلیٰ کو آگاہ کررہے ہیں، مقامی انتظامیہ اور سماجی عمائدین پر مشتمل کمیٹی کے مذاکرات چل رہے ہیں، مذاکرات کا عمل شروع ہوتے ہی بنوں میں امن بحال ہوا۔ان کا کہنا تھا کہ سماجی عمائدین اور انتظامیہ پر مشتمل کمیٹی علاقے میں دیر پا قیام امن کو یقینی بنائے  گی، سماجی عمائدین پر مشتمل کمیٹی کی جلد وزیر اعلیٰ سے ملاقات متوقع ہے، وزیر اعلی کی ہدایت پر قائم کمیشن بہت جلد واقعے کے حوالے سے انکوائری رپورٹ جمع کرے گا۔بیرسٹر ڈاکٹرسیف نے مزید کہا کہ خیبرپی کے دہشتگردی سے پہلے متاثر ہے اور کسی بھی بڑے سانحے کا متحمل نہیں ہو سکتا، عوام کی جان و مال کی حفاظت صوبائی حکومت کی اولین ترجیحات میں شامل ہیں، عوام شدت پسندی کے خاتمے کے لیے صوبائی حکومت اور مقامی انتظامیہ سے تعاون کریں۔