حکومت اور فلور ملز مالکان کے درمیان مذاکرات کامیاب

وفاقی حکومت اور فلور ملز مالکان کے درمیان مذاکرات کامیاب ہوگئے ہیں۔مذاکرات کی صدارت وفاقی وزیراحد چیمہ نے کی.وفاقی وزیرخزانہ محمد اورنگزیب، وزیر مملکت علی پرویزملک، چیئرمین ایف بی آر ، فلور ملزایسوسی ایشن کے سینٹرل چیئرمین عاصم رضا سمیت چاروں صوبوں کے چیئرمین بھی شریک ہوئے۔مذاکرات کے بعد چیئرمین آل پاکستان فلورملز ایسوسی ایشن عاصم رضا نے گفتگو کرتے ہوئے کہا کہ ملک بھرکی فلور ملز معمول کے مطابق کام کریں گی۔فلور ملز پر انکم ٹیکس ایکٹ کا سیکشن 153 اے لاگونہیں ہوگا جبکہ ملزکمیشن سسٹم کے تحت آٹا فروخت کریں گی، آٹا ڈیلرز اور پرچون فروش فلور ملزکا آٹا فروخت کرنے پر فی تھیلا کمیشن لیں گے۔عاصم رضا نے مزید بتایا کہ کمیشن کی رقم پر انکم ٹیکس ایکٹ کے تحت ود ہولڈنگ ٹیکس لاگو ہوگا اور جن ہول سیلرز اور ریٹیلرز کی سالانہ سیل 10 کروڑسے کم ہے وہ آئندہ برس ود ہولڈنگ ٹیکس نیٹ میں شامل ہوں گے۔آئندہ مالی سال کے فنانس بل میں آٹا کاروبار پرٹیکس اصلاحات کو شامل کیا جائے گا۔مذاکرات کامیاب ہونے کے بعد فلور ملز ایسوسی ایشن نے ہڑتال ختم کرنے کا اعلان کردیا۔