ایگون اوپن ٹینس، اینڈی مرے اور اینڈرسن مینز سنگلز فائنل میں پہنچ گئے

لندن (اے پی پی) برطانوی پلیئر اینڈی مرے اور کیون اینڈرسن فتوحات برقرار رکھتے ہوئے ایگون اوپن ٹینس ٹورنامنٹ مینز سنگلز فائنل میں پہنچ گئے۔ ایگون اوپن کے سلسلے میں کھیلے گئے مینز سنگلز ایونٹ کے سیمی فائنل میچ میں اولمپک چیمپئن اینڈی مرے نے شاندار کھیل پیش کرتے ہوئے حریف کھلاڑی وکٹر ٹرائیکی کو سٹریٹ سیٹس میں دلچسپ مقابلے کے بعد ٹائی بریک پر 6-3 اور 7-6، (7-4) سے زیر کر کے فائنل کیلئے کوالیفائی کیا۔ دوسرے سیمی فائنل میں جنوبی افریقن پلیئر کیون اینڈرسن نے جائلز سیمن کو سخت مقابلے کے بعد زیر کر کے فائنل میں پہنچنے کا اعزاز حاصل کیا۔ ارجنٹائن کے سٹار پلیئر جان مارٹن ڈیل پوٹرو سرجری کے باعث سال کے تیسرے گرینڈسلام ٹینس ٹورنامنٹ ومبلڈن اوپن سے دستبردار ہو گئے۔ آل انگلینڈ کلب کی طرف سے جاری کردہ بیان کے مطابق سابق یو ایس اوپن چیمپئن نے حال ہی میں تیسری بار کلائی کی سرجری کرائی ہے اور ڈاکٹروں نے انہیں مکمل آرام کا مشورہ دیا ہے جس کے باعث مارٹن نے ومبلڈن اوپن میں شرکت سے معذرت کر لی ہے۔ مارٹن کی جگہ آسٹریلین پلیئر مارنکو کو مینز سنگلز ایونٹ کے ڈراز میں شامل کیا گیا ہے۔