لاہور(نمائندہ سپورٹس +سپورٹس رپورٹر) پاکستان کی ٹی ٹونٹی ورلڈ کپ 2009 کی جیت کو 11 سال مکمل ہوگئے۔ 11 ویں سالگرہ کے موقع پر سابق کپتان یونس خان نے کہا کہ ٹی ٹونٹی ورلڈ کپ 2009 ء میں ہرچیلنج کیلئے تیار تھے، ٹیم سلیکشن، باؤلنگ اور بیٹنگ آرڈر کی وجہ سے مطمئن تھے۔ یقین تھا کہ ٹی ٹونٹی ورلڈ کپ جیت کر جائیں گے۔ فاسٹ باؤلر سہیل تنویر کا کہنا تھا کہ بد قسمتی سے 2007 کے ورلڈ کپ کا فائنل نہیں جیت سکے تھے۔ کامران اکمل نے کہا کہ شروعات اچھی نہیں تھی لیکن ٹیم نے کم بیک کیا۔ مصباح الحق نے کہا کہ مجموعی طور پر پاکستان ٹیم کی کارکردگی اچھی نہیں تھی، شاہد آفریدی ، عمر گل اور سعید اجمل کی بروقت پرفارمنس سے کامیابی ملی۔شاہد آفریدی نے کہا کہ نیوزی لینڈ کیخلاف میچ میں عمر گل کے سپیل اور میرے کیچ سے ٹیم دوبارہ یکجا ہوئی۔احمد شہزاد نے کہا کہ عمر گل کی نیوزی لینڈ کیخلاف پرفارمنس سے جیت میں مدد ملی۔ سعید اجمل کا کہنا ہے کہ شاہد آفریدی نے بہت اچھا کھیل پیش کیا اور یونس خان نے بہت زبردست کپتانی کی تھی۔ شعیب ملک نے کہا کہ کراؤڈ کی جانب سے جو سپورٹ ملی وہ بیان نہیں کر سکتا ۔ سلمان بٹ نے کہا کہ جیت سے کھلاڑی مزید متحرک ہوئے۔ محمد عامر کا کہنا ہے کہ سیمی فائنل میں اوور کے بارے میں لوگ آج تک پوچھتے ہیں، سارا کریڈٹ یونس خان کو جاتا ہے جنہوں نے میری حوصلہ افزائی کی۔