اسلام آباد(خبر نگار)الخدمت فانڈیشن شمالی وزیرستان کے صدرانجینئراسداللہ شاہ اور ان کے ساتھیوں کی گزشتہ روز شمالی وزیرستان کی تحصیل میر علی میں نامعلوم افراد کی فائرنگ سے شہادت پرگہرے رنج اور افسوس کا اظہار کیا گیا ہے، قائم مقام صدر شاہد اقبال نے کہا کہ آپ نے شمالی وزیرستان میں الخدمت کے کام کو بہترین انداز میں منظم کیا۔
 آپ نے میرعلی اور میران شاہ کے علاقوں میں بازاروں اور ٹرانسپورٹ اڈوں میں مزدوری کرنے والے سٹریٹ چلڈرن کے لئے الخدمت چائلڈ پروٹیکشن سنٹرز کی بنیاد رکھی ،شمالی وزیرستان میں بے آسرا اور یتیم بچوں کے لئے آغوش الخدمت ہوم کا قیام آپکا دیرینہ خواب تھا،آپ ہمیشہ جس کی تکمیل کے لئے تگ و دوکرتے نظر آئے،ان شا اللہ جلد ہی آپ کے اس خواب کو پایہ تکمیل تک پہنچایا جائے گا۔ آپ شمالی وزیرستان کے سینکڑوں یتیم بچوں کی کفالت کی ذمہ داری بخوبی نبھا رہے تھے۔ آپ تنگدست بیواؤں کی مالی معاونت اور ان کو خود کفیل بنانے کے لئے بھی کوشاں رہے۔آپ کی تمام زندگی دکھی انسانیت کی خدمت سے عبارت ہے۔آپ کی مثالی خدمات کو ہمیشہ یاد رکھا جائے گا۔اللہ تعالی آپ کی اور آپ کے ساتھیوں کی کامل بخشش اور لواحقین کو صبرِ جمیل عطا فرمائے،آمین۔