یونیسکو چیئر کا قیام ہماری جامعہ کی  خوش نصیبی ہے، شیخ الجامعہ این ای ڈی

کراچی (نیوز رپورٹر)  جامعہ این ای ڈی میں یونیسکو چیئر کا قیام ہماری جامعہ کی خوش نصیبی ہے۔ان خیالات کا اظہار شیخ الجامعہ این ای ڈی پروفیسر ڈاکٹرسروش حشمت لو دھی نے یونیسکو ہیڈ کواٹر پیرس میں معاہدے کے موقعے پر کیا۔جامعہ ترجمان کے مطابق یہ معاہدہ شیخ الجامعہ این ای ڈی ڈاکٹر سروش لودھی اورچیف آف سیکشن کیپسٹی بلڈنگ سائنس اینڈ انجینئرنگ مسAmal Kasry ،چیف آف سیکشن سائنس پالیسی اینڈ پارٹنرشپ مسٹر Ezra Clarkکے درمیان ہوا جو کہ ڈائریکٹر جزل یونیسکو کی نمائندگی کررہے تھے۔اس موقعے پر ڈین فیکلٹی آف کیمیکل اینڈ سروسیس انجینئرنگ اور ڈائریکٹر کوالٹی انہاسمنٹ سیل پروفیسر ڈاکٹر آصف احمد شیخ، ڈپٹی ڈائریکٹر کوالٹی انہاسمنٹ سیل ڈاکٹرواصف احمد پیرس میں موجود پاکستانی سفارت خانے کی کونسلربرائے وفود حذیفہ خانم اور پریس کونسلر دانیال سلیم گیلانی بھی موقعے پر موجود تھے۔ شیخ الجامعہ پروفیسر ڈاکٹر سروش لودھی نے پاکستان واپسی پر خصوصی گفتگو کرتے ہوئے بتایا کہ یونی ورسٹی کی جانب سے معروف آرکیٹیکٹ اور پلانر پروفیسر ڈاکٹر نعمان احمد کو یونیسکو چیئر ہولڈر مقرر کیا گیا ہے۔ اْن کا مزید کہنا تھا کہ اس چیئر کے توسط سے مختلف ورکشاپس، کانفرنس اور سیمینارز کے ذریعے اساتذہ اور طالب علموں کو تربیت دی جائے گی جب کہ پیشہ ور افراد بھی اس سے مستفید ہوسکیں گے۔