لاہور(سپورٹس رپورٹر)پاکستان کی کشمالہ طلعت نے تھائی لینڈ شوٹنگ چیمپئن شپ میں سونے کا تمغہ جیت لیا، بنکاک میں جاری ایونٹ میں کشمالہ طلعت نے 25 میٹر پسٹل میں اپنی برتری ثابت کرکے ملک کا نام روشن کیا، ان کا مجموعی سکور 575 رہا۔ایشین گیمز کی برانز میڈلسٹ کشمالہ طلعت  پیرس اولمپکس کیلئے کوالیفائی کرچکی ہیں۔ تھائی لینڈ شوٹنگ چیمپئن شپ میں شریک دوسرے پاکستانی شوٹر گلفام جوزف نے 10 میٹر ایئرپسٹل میں سلور میڈل اپنے نام کیا ہے۔کشمالہ کیساتھ گلفام جوزف بھی پیرس اولمپکس میں پاکستان کی نمائندگی کریں گے، ان کے ساتھ غلام مصطفی بشیر بھی پیرس اولمپکس میں جگہ بنا چکے ہیں۔