لاہور(سپورٹس رپورٹر)سابق کپتان و سوئنگ کے سلطان وسیم اکرم نے کہا ہے کہ شاہین آفریدی کو دوبارہ کپتانی مل جائیگی۔ بابر اعظم کو کپتانی سے ہٹایا شاہین آفریدی کو لے کر آئے وہ ایک سیریز ہارے اس دوران چیئرمین بدلے‘کپتان تبدیل کردو تو شاہین کو ہٹا دیا گیا۔ دنیائے کرکٹ میں یہ سب ہونے پر لوگ ہم پر ہنستے ہیں۔ اگر شاہین آفریدی کو کپتان بنایا تھا تو اس بچے کو ایک سال تو دینا چاہیے تھا پھر آپ کپتان تبدیل کردیتے۔ ہم سے تو یہ پوچھتے نہیں ہیں اچھا ہی ہے کہ ہم پاکستان کرکٹ سے دور ہیں۔ شاہین آفریدی وکٹ ٹیکنگ بائولر ہیں خاص طور پر نئی گیند سے وہ وکٹیں حاصل کرتے ہیں۔ سب کو پتا ہے کہ شاہین آفریدی آگے گیند یا پھر یارکر کریں گے پھر بھی وہ وکٹ لیتے ہیں۔ شاہین آفریدی کا مستقبل روشن ہے، کپتانی انہیں دوبارہ مل جائیگی۔ اگر نہیں بھی ملتی تو انہیں اپنی گیم پر توجہ دینی چاہیے۔شاہین آفریدی سے ورلڈ کپ کے دوران ملاقات ہوئی تھی لیکن کمنٹری میں ہماری مصروفیات زیادہ ہوتی ہیں تو صرف سلام دعا ہی ہوپاتی ہے۔ کوئی خاص بات نہیں ہوتی۔ شاہین آفریدی میری طرح نئے گیند سے اچھی بائولنگ کرتے ہیں، دونوں بائیں ہاتھ سے بائولنگ کرتے ہیں اور نئی گیند اندر کی طرف لاتے ہیں، وکٹیں حاصل کرتے ہیں۔