لاہور ( سپورٹس رپورٹر) پاکستان ڈیف کرکٹ ایسوسی ایشن کے زیر اہتمام پنجاب بنک ٹی ٹونٹی کرکٹ چیمپئن شپ شروع ہو گئی، بنک آف پنجاب کے صدر ظفر مسعود نے بال کو ہٹ لگا کر چیمپئن شپ کا افتتاح کیا۔اس موقع پر چیمپئن شپ میں شریک 18 ٹیموں کے کھلاڑی بھی موجود تھے۔ بنک آف پنجاب کے صدر ظفر مسعود کا کہنا تھا کہ ڈیف کے ایسے پڑھے لکھے کھلاڑی جو بیروزگار ہیں ان کیلئے نوکریوں کا بندوبست کیا جائیگا۔ ان کا بنک ہر سال ڈیف کرکٹ ٹورنامنٹ کو سپانسر کریگا۔ اس موقع پر پاکستان ڈیف کرکٹ ایسوسی ایشن کے صدر عرفان معراج نے نیشنل ٹی ٹونٹی ٹورنامنٹ کے انعقاد کے حوالے سے بتایا، ان کا کہنا تھا کہ پاکستان ڈیف کرکٹ ٹیم نے بین الاقوامی سطح پر کامیابیاں حاصل کی ہیں اور مستقبل میں بھی قوم کو خوشیاں فراہم کریگی۔