لاہور(سپورٹس رپورٹر)پاکستان قومی کرکٹ ٹیم کے ہیڈ کوچ عبدالرحمان نے کہا ہے کہ میں 15 برس سے کوچنگ کر رہا ہوں، کوچنگ میری جاب ہے، عمر گل اور محمد یوسف بڑے نام ہیں ہم مل کر کام کریں گے کوئی کسی کو ڈکٹیٹ نہیں کریگا۔ قومی ٹیم کی کوچنگ خواب ہوتا ہے، میرے لئے عزت اور اعزاز کی بات ہے اور میرے لیے اچھا موقع ہے، فرق لانے کی کوشش کروں گا۔ ہمارے پاس باصلاحیت کھلاڑی ہیں، نوجوان کھلاڑیوں کیلئے پرفارم کرنے کا بڑا اچھا موقع ہے، ڈومیسٹک اور پی ایس ایل میں کھلاڑیوں نے اچھا پرفارم کیا ہوا ہے۔ پاکستان ٹیم کا اچھا کامبی نیشن ہے، بڑے پلیئرز کو ہم مس کریں گے ان کی جگہ کھیلنے والے باصلاحیت ہیں، ہر شعبے میں شامل کھلاڑی فارم میں ہیں، تمام کھلاڑی ٹرمپ کارڈ ہیں، سب کو مل کر اچھا کھیلنا ہو گا تب ہی جیت سکیں گے۔ افغانستان کی ٹیم اچھی ہے، ان کے خلاف ہمیشہ کلوز مقابلہ ہوتا ہے۔، افغانستان کی بیٹنگ سے زیادہ بائولنگ مضبوط ہے۔