راولپنڈی+لاہور+ساہیوال(این این آئی+نمائندہ نوائے وقت) نیو اسلام آباد ایئرپورٹ پر اے این ایف نے کارروائی کے دور ان بیرون ملک منشیات سمگلنگ کی کوشش ناکام بنا دی ۔منگل کو اے این ایف کے مطابق ملزم عبدالرحمان کے پیٹ میں ہیروئن بھری کیپسول ہونے کا انکشاف ہوا ،مشکوک ملزم نے پیٹ میں ہیروئن بھرے کیپسول کی موجودگی کا اعتراف بھی کر لیا۔اے این ایف کے مطابق گرفتار ملزم کا تعلق ہنگو سے ہے۔ قومی ائر لائن کی پرواز پی کے 291 سے مسقط جانا چاہتا تھا۔ادھرریلوے پولیس نے لاہور ریلوے سٹیشن پر کارروائی کرتے ہوئے انڈیا جانے والی سمجھوتہ ایکسپریس سے 8کلو ہیروئین برآمد کرلی۔ سمجھوتہ ایکسپریس کے بریک پریشر ٹینکی کے خفیہ خانوں میں پیکٹ چھپا رکھے تھے۔ متعلقہ بوگی اتروا کر باقی بوگیوں پر مشتمل سمجھوتہ ایکسپریس کو بھارت روانہ کردیا گیا۔علاوہ ازیں پولیس غلہ منڈی نے جنرل بس سٹینڈ عارف موڑ پر چھاپہ مار کر ایک منشیات کے سمگلر کوئٹہ کے بر ہان پٹھان کو ساڑھے پانچ کلو ہیر وئن فروخت کر تے ہوئے رنگے ہاتھوں گرفتار کر لیا اور ہیر وین قبضہ میں لے لی۔