لندن(یواین پی)انگلینڈ اینڈ ویلز کرکٹ بورڈ کے زیر اہتمام رائل لندن ون ڈے کرکٹ کپ اختتامی مرحلے میں داخل ہوگیا۔ ہیمپشائر اور سمر سیٹ کی ٹیموں کے درمیان ایونٹ کا فائنل میچ 25 مئی کو لارڈز، لندن میں کھیلا جائے گا۔ تفصیلات کے مطابق ٹورنامنٹ میں اس سے قبل پہلے سیمی فائنل میں ہیمپشائر کی ٹیم نے لنکا شائر کو 4 وکٹوں سے شکست دی اور فائنل کھیلنے کا اعزاز حاصل کیا۔دوسرے سیمی فائنل میچ میں سمر سیٹ کی ٹیم نے ناٹنگھم شائر کو 115 رنز سے شکست دیکر فائنل کے لئے کوالیفائی کیا۔ واضح رہے کہ دو فائنلسٹ ٹیموں کے کپتانوں نے فائنل میچ میں کامیابی کے لئے بیانات دیئے ہیں اور توقع کی جارہی ہے کہ ٹورنامنٹ کا فائنل میچ انتہائی سخت اور کانٹے دار ہوگا اور شائقین کرکٹ کو اچھا میچ دیکھنے کو ملے گا۔ فائنلسٹ ٹیموں کے درمیان فائنل میچ 25 مئی کو لارڈز، لندن میں کھیلا جائے گا۔