نوائے وقت کے سابق بیورو چیف عثمان اجمیری کی یاد میں پانی کی سبیل قائم

حیدرآباد (نامہ نگار) بزرگ سماجی و سیاسی رہنماء سید فصیح الحسنین شاہ کی جانب سے نوائے وقت حیدرآباد کے سابق بیورو چیف مرحوم عثمان اجمیری کی یاد میں حیدرآباد پریس کلب کے باہر ٹھنڈے پانی کی سبیل کا اہتمام کیا گیا۔سخت گرمی اور دھوپ میں شاہراہ میراں محمد شاہ سے گذرنے والے سینکڑوں افراد نے سبیل سے پانی پیا ۔اس موقع پر سید فصیح الحسنین شاہ  نے کہا کہ مرحوم عثمان اجمیری حیدرآباد کے نہ صرف قابل فخر صحافی تھے بلکہ اپنی ملنسار طبیعت اور خیر خواہانہ مزاج کے باعث تمام حلقوں میں احترام کی نظر سے دیکھے جاتے تھے۔ہر ایک کے کام آنا ان کے مزاج کا حصہ تھا۔ عثمان اجمیری کے ایصال ثواب کے لئے ٹھنڈے پانی کی سبیل کا اہتمام کرنے کا مقصد انہیں خراج تحسین پیش کرنا بھی ہے۔ عثمان اجمیری کے دیرینہ دوست سید فصیح الحسنین شاہ نے کہا کہ گرمی کی شدید لہر کے دوران مسافروں اور راہگیروں کے لئے پینے کا ٹھنڈا پانی فراہم کرنے کا خیال انہیں عثمان اجمیری کی انسان دوست طبیعت کی وجہ سے ہی آیا۔اس موقع پر عثمان اجمیری کے ایصال ثواب کے لئے دعا بھی کی گئی۔