بہنوئی سے انتقام‘ شہری نے بنگلور ایئرپورٹ پر بم کی اطلاع دے کر کھلبلی مچا دی

بنگلور(آئی این پی ) بھارتی شہر بنگلور کے انٹرنیشنل ایئر پورٹ پر بم کی اطلاع نے ہلچل مچا دی، پولیس نے ایک شخص کو گرفتار کر لیا۔تفصیلات کے مطابق بنگلور پولیس کو جمعہ کے روز علی الصبح ایئر پورٹ پر ایک جعلی بم کی دھمکی کی کال موصول ہوئی، جس نے حکام میں کھلبلی مچا دی۔بم کی اطلاع کے بعد پولیس نے انڈسٹریل سیکیورٹی فورس، بم اسکواڈ اور ایک ڈاگ اسکواڈ کے ساتھ مل کر ایئر پورٹ کے پورے علاقے کو گھیرے میں لے کر تلاشی لی، بنگلور ایئر پورٹ کے حکام نے میڈیا کو واقعے کی تصدیق کرتے ہوئے کہا کہ یہ ایک جھوٹی اطلاع تھی، پولیس نے اس سلسلے میں ایک شخص کو حراست میں لے لیا ہے۔بنگلور پولیس نے بتایا کہ ملزم سباشیش گپتا نے رات کے وقت اپنے بہنوئی دیپک سے اپنی بہن کو طلاق دینے کا بدلہ لینے کے ارادے سے بم کی جھوٹی کال کی تھی۔