عمران خان نے سوشل میڈیا ٹیم کو گالی گلوچ سکھائی: عطاءاللہ تارڑ 

لاہور (نیوز رپورٹر ) مسلم لیگ (ن)کے ڈپٹی سیکرٹری جنرل عطاءاللہ تارڑنے کہا ہے کہ عمران خان اگر باز نہ آئے تو اگلی پریس کانفرنس ایسی ہوگی کہ گھر سے نہ نکل سکیں گے۔ دن رات ایک کرکے آپ نے سوشل میڈیا ٹیم کو گالی گلوچ سکھائی۔اداروں ، لوگوں کی ماں بہنوں سیاست دانوں کو آپ گالیاں دیتے ہیں اپنی زبان کو لگام دیں ورنہ ہم زبان کھینچ لیں گے۔ان خیالات کا اظہار انہوں نے ماڈل ٹاﺅن لیگی سیکرٹریٹ میں پریس کانفرنس سے خطاب کرتے ہوئے کیا۔اس موقع پر ملک احمد خان نے بھی خطاب کیا۔عطاءاللہ تارڑ نے کہا کہ ہمارے سسٹم میں بیٹیاں سانجھی ہوتی ہیں۔مریم نواز کو باپ کے سامنے گرفتار کیا ہم نے برداشت کیا۔فریال تالپور کو گرفتار کروایا جہانگیر ترین کی بیٹیوں پر پرچے کروائے۔ شہباز شریف اپنی بیٹی کے ساتھ عدالت میں پیش ہوئے۔ آپ بتائیں فرح بی بی کون تھی۔ کیا آپ نے ڈی پی او ساہیوال کو نہیں ہٹایا تھا کہ انہوں نے خاور مانیکا کا فون نہیں اٹھا یا تھا۔