200 کلو میٹر تک ٹرینوں کے کرایوں میں 54 فیصد تک کمی 

لاہور (این این آئی) ریلوے حکام نے 1کلو میٹر سے 200کلو میٹر تک تمام کلاسز کی ٹرینوں کے کرایوں میں کمی کر دی۔ ریلوے حکام کے مطابق بعض ٹرینوں کی اکانومی کلاس کے کرایوں میں 54فیصد تک کمی کی گئی ہے جبکہ اے سی کلاس کے کرایوں میں 40فیصد تک کمی کی گئی۔ لاہور تا راولپنڈی کے درمیان چلنے والی ٹرین ریل کار کی اکانومی کلاس کا کم سے کم کرایہ 250روپے تھا جو کم ہو کر 100روپے کر دیا گیا ہے۔ خیبر میل ٹرین کی اکانومی کلاس کا 1کلو میٹر سے 130کلو میٹر تک کرایہ 250روپے تھا جو کم ہو کر 100 روپے رہ گیا ہے۔ ریلوے حکام نے کرایوں میں کمی کا نوٹیفکیشن جاری کر دیا ہے۔