سپر سیریز ہاکی ٹورنامنٹ آج سے شروع‘ پاکستان آسٹریلیا سے مقابلہ کیلئے تیار

پرتھ+اوکاڑہ (نیوز ایجنسیاں) نائن سائےڈسپر سیریز ہاکی ٹورنامنٹ آج سے آسٹریلیا کے شہر پرتھ میں شروع ہوگا۔ پاکستان کی ٹیم اپنا پہلا میچ میزبان آسٹریلیا کے خلاف کھیلے گا جبکہ اسی روز دوسرا میچ انگلینڈ اور بھارت کی ٹیموں کے درمیان کھیلا جائیگا۔ سپر سیریز ہاکی ٹورنامنٹ 25 نومبر کو اختتام پذیر ہوگا جس کے بعد چیمپئنز ٹرافی ٹورنامنٹ یکم دسمبر سے آسٹریلیا میں ہی شروع ہوگا۔ پاکستان ہاکی فیڈریشن کے صدر قاسم ضیاءنے کہا ہے کہ انہیں قوی امید ہے کہ قومی ہاکی ٹیم چیمپئنز ٹرافی میں اچھی کارکردگی کا مظاہرہ کرے گی، قومی کھیل کو دوبارہ سے عروج کی جانب گامزن کرنے کیلئے تمام وسائل بروئے کار لائے جا رہے ہیں، فتح اور شکست دونوں صورتوں میں کریڈٹ اور ذمہ داری ٹیم مینجمنٹ کی ہو گی۔ پاکستان ہاکی ٹیم کو سنہرے دور کی جانب لے جانے کی بھرپور کوششیں کر رہے ہیں۔