لاہور (خصوصی نامہ نگار)سیکرٹری اوقاف ڈاکٹرطاہررضابخاری اورکمشنر لاہور ڈویژن زید بن مقصود نے ڈی آئی جی آپریشنز لاہور محمد فیصل کامران، ڈپٹی کمشنر لاہور سیّدموسیٰ رضا اورخطیب بادشاہی مسجد مولانا عبد الخبیر آزادکے ہمراہ بادشاہی مسجد کا دورہ کیا۔ اس موقع پر زائرین و نمازیان کی سکیورٹی، آمدورفت، جاری تعمیراتی و ترقیاتی امور اور بالخصوص نئی تشکیل شدہ تبرکات گیلری سمیت دیگر امور کا جائزہ لیا۔ انہوں نے کہا بادشاہی مسجد مسلم طرز ِ تعمیر کا شاہکار اور عظیم دینی مرکز ہے۔ نمازیوں کی آمدورفت میں کسی نوعیت کی بھی دِقت پیدا نہیں ہونے دی جائے گی۔ تبرکات مقدسہ امت مسلمہ کا اثاثہ ہیں،ان کی سکیورٹی بین الاقوامی معیار کی حامل ہوگی۔مستقل سکیورٹی سسٹم اور سٹاف کے علاوہ اسے سیف سٹی کے ساتھ بھی منسلک کیا جائے گا۔ تبرکات کی دیکھ بھال اور حفاظت کیلئے سکیورٹی مینجمنٹ کا الگ یونٹ تشکیل دیا جائے گااور  نئی تبرکات گیلری کی شفٹنگ کیلئے قواعد و ضوابط پر پوری طرح عمل درآمدکو یقینی بنایاجائے گا۔