الیکشن ایکٹ کی خلاف ورزی‘بلاول‘ سپیکر قومی اسمبلی کیخلاف ہائیکورٹ میں درخواست

لاہور(خبرنگار) الیکشن ایکٹ کی خلاف ورزی کے الزام میں چیئرمین پاکستان پیپلز پارٹی بلاول بھٹو زرداری اور سپیکر قومی اسمبلی سردار ایاز صادق کے خلاف لاہور ہائیکورٹ میں درخواست دائر کر دی گئی۔لاہور ہائیکورٹ میں دائر کردہ درخواست میں الیکشن کمیشن، بلاول بھٹو اور سپیکر قومی اسمبلی سردار ایاز صادق کو فریق بنایا گیا ہے۔درخواست میں موقف اختیار کیا گیا ہے کہ بلاول بھٹو زرداری پاکستان پیپلز پارٹی پارلیمنٹرین کے ٹکٹ پر رکن قومی اسمبلی منتخب ہوئے جبکہ بلاول بھٹو چیئرمین پاکستان پیپلز پارٹی بھی ہیں۔دائر درخواست میں کہا گیا کہ پاکستان پیپلز پارٹی پارلیمنٹرین اور پاکستان پیپلز پارٹی دو الگ الگ سیاسی جماعتیں ہیں اور الیکشن ایکٹ 2017ء کی خلاف ورزی ہو رہی ہے، سپیکر قومی اسمبلی کو بلاول بھٹو کی اس خلاف ورزی پر یکم نومبر کو خط لکھا گیا تھا، بلاول بھٹو اس خلاف ورزی پر نااہل ہو سکتے ہیں۔درخواست میں استدعا کی گئی کہ عدالت الیکشن ایکٹ 2017ء کی خلاف ورزی کرنے پر متعلقہ فریقین کے خلاف کارروائی کا حکم دے۔