فیروز والہ میں تین سالہ بچی قتل، زیادتی مرڈر کا خدشہ

فیروزوالہ‘قصور‘ پیر محل (نمائندہ نوائے وقت ‘نامہ نگار) جی ٹی روڈ کی آبادی سکندر آباد فیروز والامیں نامعلوم افراد نے محنت کش کی ساڑھے تین سالہ بچی کو گلی سے کھیلتے ہوئے اغوا کر نے کے بعد گلا دبا کر اسے قتل کر دیا۔ معصوم مقتولہ کی نعش قریبی مکان سے ملی مبینہ زیادتی کا خدشہ بتایا گیا ہے کہ سکندر آباد کے رہنے والے محنت کش فیاض احمد کی ساڑھے تین سالہ بچی فضاء فیاض گلی میں بچوں کے ہمراہ کھیل رہی تھی کہ اس دوران نامعلوم افراد نے اسے اغواکر کے غائب کر دیا اگلے روز مغویہ کی نعش محلے کی دوسری گلی واقع مکان کے اندر سے مردہ حالت میں ملی فیروز والا پولیس نے معصوم مقتولہ کی نعش قبضہ میں لے کر پوسٹ مارٹم کے لیے ہسپتال بھجوا دی پولیس نے نامعلوم ملزموں کیخلاف اغوا کے الزام میں مقدمہ درج کر لیا۔ڈی پی او شیخوپورہ بلال ظفر شیخ پولیس نفری کے ہمراہ موقع پر پہنچ گئے جنہوں نے جائے وقوعہ کا معائنہ کیا ۔ مقتولہ کے ورثاء کو یقین دہانی کرائی کہ ملزموں کو جلد گرفتار کر لیا جائے گا۔قصور کے نواحی گاؤں گوہڑ جاگیر میں اوباش ملزم نے جواں سالہ لڑکی کو زیادتی کانشانہ بناڈالا۔گائوں 286گ ب کے رہائشی بچے (الف) سے عبداللطیف نے زیادتی کرڈالی۔