مرید کے +فیروز والا+سیدوالا(نامہ نگاران) مرید کے اور سیدوالا میں ٹریفک حادثات ، باپ بیٹے اور دو بھائیوں سمیت 6 افراد ہلاک ہوگئے۔ مریدکے میں موٹر سائیکل رکشہ اور منی ٹرک کے درمیان تصاد م کے نتیجے میں محنت کش باپ بیٹا جاں بحق جبکہ ٹرین کی زد میں آکر 14 سالہ چل بسا۔ مقامی فیکٹری میں کام کرنے والے محنت کش باپ بیٹامحمد اسلم اور زوہیب موٹر سائیکل رکشہ پر سوار ہو کر گھر کی طرف جا رہے تھے کہ مریدکے شیخوپورہ روڈ پر منی ٹرک نے اسے ٹکر ماردی جس کے نتیجے میں 45 سالہ محمد اسلم اور اس کا 16 سالہ بیٹا زوہیب اسلم جاں بحق جبکہ دو افراد زخمی ہوگئے۔ دوسرا حادثہ معصوم شاہ ریلوے پھاٹک کے قریب پیش آیا جہاں سلطان پارک کا رہائشی14 سالہ ذیشان ٹرین کی زد میں آکر جاں بحق ہو گیا۔ سیدوالا میں تیز رفتار ٹرک کے نیچے آکر موٹر سائیکل سوار 2 بھائی اور کزن جاں بحق۔ بتایا جاتا ہے کہ نواحی گائوں چک 17کے دو سگے بھائی ابرار حسین،یونس اور کزن غلام نبی سودا سلف لینے اپنے گائوں سے موٹرسائیکل پر سوار ہو کر سیدوالا آ رہے تھے ۔جڑانوالا روڑ پر غنی رائس ملز کے بالمقابل سامنے سے آنے والے ٹرک کے نیچے آ گئے جس کے نتیجہ میں ابرار اور غلام نبی موقع پر جاں بحق ہو گئے جبکہ یونس شدید زخمی ہو گیا جسے ہسپتال پہنچا دیا گیا جہاں یونس زخموں کی تاب نہ لاتے ہوئے دم توڑ گیا۔