پائیدار امن کیلئے عالمی برادری مسئلہ کشمیر حل کرائے: بلاول

اسلام آباد (نوائے وقت رپورٹ) بلاول بھٹو زرداری نے کہا ہے کہ مقبوضہ کشمیر میں بھارتی مظالم عالمی امن کے خواب کے شرمندہ تعبیر ہونے کے آگے رکاوٹ ہیں، عالمی برادری مسئلہ کو منہ پھیرنے کی متحمل نہیں ہو سکتی۔ عالمی سطح پر تنازعات کے حل کے لئے سفارتکاری اور ڈائیلاگ پر انحصار کو بڑھانا اور بقائے باہمی کو فروغ دینا ہوگا۔ امن کے عالمی دن پر پیغام میں انہوں نے کہا کہ عالمی برادری دنیا میں پائیدار امن کے خواب کو حقیقت بنانے کیلئے مسئلہ کشمیر حل کرائے۔ ہم دنیا کو میدان جنگ و جدل بنانے کے متحمل نہیں ہو سکتے، پاکستانی قوم دنیا میں امن و آشتی کی علمبردار ہے، کل آنے والی نسلوں کو پائیدار امن دینے کی خاطر آج ہمیں سکولوں پر زیادہ سے زیادہ سرمایہ لگانا ہوگا۔ دنیا کو سب کے لیے ایک جیسا مسکن بنانے کی خاطر ہم میں سے ہر ایک کو اپنا کردار نبھانا ہو گا، ہمیں گھروں میں بچوں کو صبر اور دوسروں کا احترام کرنا سکھانا ہوگا۔ اپنے محلے، گلی کوچوں میں رواداری اور بین المذاہب و بین السانی ہم آہنگی کو فروغ دینا ہوگا، ملکی سطح پر جمہوریت کو تقویت اور سیاسی استحکام کو یقینی بنانا ہوگا۔ عالمی سطح پر تنازعات کے حل کے لئے سفارتکاری اور ڈائیلاگ پر انحصار کو بڑھانا اور بقائے باہمی کو فروغ دینا ہوگا۔