چارسدہ (بی بی سی اردو + ایجنسیاں) چارسدہ میں پیپلز پارٹی شیرپاﺅ کے صوبائی رہنما اور سابق ایم پی اے عالم زیب عمرزئی اپنے چار ساتھیوں سمیت ایک قاتلانہ حملے میں ہلاک ہو گئے۔ پولیس کے مطابق واقعہ جمعرات کی صبح پڑانگ کے علاقے مرزاگان میں پیش آیا۔ پولیس اہلکار نے بی بی سی کو بتایا کہ سابق ایم پی اے مقامی سوئی گیس دفتر میں کسی کام کے سلسلے میں گئے جب وہاں سے جانے لگے تو نامعلوم مسلح افراد نے ان کی گاڑی پر اندھادھند فائرنگ کر دی جس سے وہ موقع پر ہی جاںبحق ہو گئے۔ دیگر جاں بحق ہونے والوں میں سوئی گیس ڈیپارٹمنٹ کا ایک اہلکار‘ سابق ایم پی اے کا ڈرائیور اور دیگر 2 افراد شامل ہیں۔ عینی شاہدین کا کہنا ہے کہ اس واقعہ کی خبر سنتے ہی سابق ایم پی اے کے درجنوں مسلح حامی ڈی ایچ کیو ہسپتال پہنچے جہاں انہوں نے احتجاج کرتے ہوئے ہسپتال میں توڑ پھوڑ بھی کی۔ عالم زیب عمرزئی پر پہلے بھی تین مرتبہ قاتلانہ حملے ہو چکے ہیں۔ حالیہ حملے کی وجوہات فوری طور پر معلوم نہیں ہو سکیں۔ آفتاب شیرپاﺅ سمیت پی پی شیرپاﺅ کے دیگر رہنماﺅں نے واقعے کی بھرپور مذمت کرتے ہوئے کہا ہے کہ عالم زیب عمرزئی کی خدمات کو ہمیشہ یاد رکھا جائے گا۔