”کنٹرول لائن پر بھارت شیر بن گیا‘ حکمران بھیگی بلی بنے ہوئے ہیں“

لاہور (خصوصی نامہ نگار) جماعت اسلامی کے سیکرٹری جنرل لیاقت بلوچ نے کہا کہ بھارت لائن آف کنٹرول اور سرحدوں پر شیر بن گیا اور حکمران بھیگی بلی بنے پھرتے ہیں۔ ان خیالات کااظہار انہوں نے منصورہ میں وفود سے ملاقات اور این اے 126 کے ذمہ داران کے اجلاس سے خطاب کرتے ہوئے کیا۔ جامعہ نعیمیہ میں کیپٹن سرفراز اور سپاہی یٰسین شہید کے ایصال ثواب کی تقریب سے خطاب کرتے ہوئے مولانا راغب نعیمی نے کہا کہ کنٹرول لائن پر بھارتی فوج کی جانب سے اشتعال انگیزی کا بھرپور جواب دینے کی اشد ضرورت ہے۔ تحریک انصاف کے رہنما فرخ جاوید مون نے کہا کہ بھارت پاکستان کی طرف سے امن‘ دوستی کے پیغام کا جواب گولیوں سے دے رہا ہے۔ سنی اتحاد کونسل کے چیئرمین صاحبزادہ حامد رضا و دیگر حاجی حنیف طیب، الحاج سرفراز تارڑ نے بھی بھارتی فوج کی فائرنگ سے پاک فوج کے کیپٹن کی شہادت کی مذمت کی۔