بارش سے متاثرہ علاقوں میں اسکاوٹس امدادی سرگرمیوں میں مصروف ،اختر میر 

کراچی(این این آئی)سندھ بوائے اسکاوٹس ایسوسی ایشن کے صوبائی اسکاوٹ کمشنر ،سابق چیف سیکریٹری سندھ سید ممتاز علی شاہ کی ہدایت پر سندھ بھر کے اضلاع میں اسکاوٹس بارشوں و سیلاب سے متاثر ین کی امداد کیلئے کوشاں ہیں اس حوالے سے سندھ بوائے اسکاوٹس ایسوسی ایشن کے صوبائی سیکریٹری سید اختر میر نے بتایا کہ سندھ کے سب سے زیادہ متاثرہ اضلاع ٹھٹھہ ، سجاول ، بدین ، خیر پور ، سکھر اور نوشہروفیروز سمیت دیگر اضلاع میں اسکاوٹس ضلعی سطح پر امدادی سرگرمیوں میں مصروف ہیں ۔ دریں اثنا کراچی ڈسٹرکٹ ویسٹ کے ڈسٹرکٹ سیکریٹری سید خورشید حسین جعفری کی سربراہی میں امدادی سامان کے ہمراہ ایک ٹیم منگل کو لسبیلہ بلوچستان روانہ ہوگی جہاں پہلے ہی کراچی اوپن ڈسٹرکٹ کے اسکاوٹس ، بلوچستان اسکاوٹس اور دیگر رفاعی تنظیموں کے ہمراہ کام کررہے ہیں ۔ سندھ و بلوچستان میں امدادی سرگرمیوں کو مانیٹر کرنے کیلئے صوبائی ہیڈ کوارٹرز پر فرقان احمد یوسفی اور ریسکیو کمشنر محمد طاہر شیخ پر مشتمل ڈیسک تشکیل دی گئی ہے ۔
اختر میر