کراچی (کرائم رپورٹر+ نوائے وقت رپورٹ) کراچی کے علاقے لیاری میں پولیس اور گینگ وار کارندوں کے درمیان مقابلے کے نتیجے میں 3 گینگسٹر ہلاک ہوگئے۔ ان کے قبضے سے بھاری تعداد میں اسلحہ بھی برآمد کر لیا گیا۔ تفصیلات کے مطابق پولیس نے خفیہ اطلاعات پر محلے چاکیواڑہ میں چھاپہ مارا تو گینگسٹر نے فائرنگ کردی، پولیس کی جوابی فائرنگ سے گینگ وار کے 3کارندے ہلاک ہوگئے۔ دوسری طرف سی ٹی ڈی نے تخریب کاری کا منصوبہ ناکام بناتے ہوئے بم بنانے کی فیکٹری پکڑ لی اور کالعدم تنظیم کے 2 دہشت گردوں کو حراست میں لیکر 100 کلو دھماکہ خیز مواد آرڈی ایکس برآمد کر لیا اسی طرح سرسید ٹاؤن میں پولیس نے بھتہ خور اور ٹارگٹ کلر اویس عرف خان جی کو گرفتار کر لیا۔