چنیوٹ (نامہ نگار) لوئر چناب نہر میں ڈینگڑو کے مقام پر شگاف پڑنے سے نہر کا بند ٹوٹ گیا جس سے متعدد گائوں زیرآب آگئے اور فصلیں تباہ ہو گئیں۔ ریسکیو اہلکاروں نے خوراک کا بندوبست کرکے متاثرہ افراد کو محفوظ مقام پر پہنچایا۔ گزشتہ رات 12 بجے کے بعد لوئر چناب نہر میں پل ڈینگڑو کے مقام پر تقریباً 2 سو فٹ چوڑا شگاف پڑنے سے کئی دیہات پانی میں آگئے جن میں چک 131 لونے والا‘ چک 128‘ ٹھٹھیاں کالونی‘ ڈیرہ ارائیاں سمیت کئی دیہات پانی کی زد میں آنے سے ان دیہاتوںکے راستے بند ہوگئے۔ ذرائع کے مطابق 1230 پر ہیڈ قادرآباد سے نہر کا پانی بند کروا دیا گیا۔ ریسکیو 1122 کے اہلکاروں نے کشتی کے ذریعے لوگوں کو محفوظ مقام پر پہنچایا۔ تاحال امدادی کارروائیاں جاری ہیں اور پانی کی سطح کم ہو گئی ہے۔