پاکستان سنگترے پیدا کرنے والے 10 بڑے ممالک میں شامل

اسلام آباد(اے پی پی)پاکستان سنگترے پیدا کرنے والے دس بڑے ممالک میں شامل ہے ۔ ملک میں کینو کی پیداوار دیگر ترشاوہ پھلوں کے مقابلہ میں 80فیصد زائد ہے۔ کینو کی برآمدات میں اضافہ کیلئے عالمی معیار کی فوڈ گریڈ پیکنگ کی ضرورت ہے ۔ معروف تجزیہ کار ہارون احمد خان نے اپنی رپورٹ میں کہا ہے کہ پاکستان کا شمار سنگترے پیدا کرنے والے دنیا کے دس بڑے ممالک میں ہوتا ہے ۔ انہوں نے کہا کہ پاکستان میں کئی اقسام کے ترشاوہ پھل پیدا کئے جاتے ہیں تاہم کینو کی پیداوار دیگر ترش پھلوں کے مقابلہ میں 80فیصد زائد ہے ۔ انہوں نے کہا کہ پاکستان میںمالٹا، گریپ فروٹ اور کینوں کی کئی اقسام پیدا کی جاتی ہیں جن میں بیج نہیں ہوتے یا انتہائی کم ہیں۔ انہوں نے کہا کہ پاکستانی فروٹس ذائقہ کے حوالے سے دنیا بھر میں پسند کئے جاتے ہیں۔