لاہور(سپورٹس رپورٹر) پاکستان سے ٹیسٹ سیریز کی فاتح انگلش کرکٹ ٹیم کے باقی کھلاڑی اور آفیشلز بھی اپنے طے شدہ شیڈول کے مطابق اپنے وطن واپسی کے سفر پر روانہ ہوگئے ۔انگلینڈ کرکٹ ٹیم کے 13کھلاڑی اور ایک آفیشل 21دسمبر کو کراچی سے پرواز ای کے 607سے دبئی کے راستے وطن واپس چلے گئے تھے۔جبکہ دیگر 16کھلاڑیوں اور آفیشلز نے اپنا سابقہ طے شدہ شیڈول برقرار رکھا تھا اور وہ جمعرات کی صبح ساڑھے 10 بجے خصوصی پروٹوکول اور سخت سکیورٹی میں ہوٹل سے ایئرپورٹ پہنچ گئے، جو کراچی سے دبئی کیلئے امارات ائیر لائن کی پرواز ای کے601 سے دبئی کے راستے وطن واپسی کا سفر کر رہے ہیں۔انگلینڈ کرکٹ ٹیم نے پہلے راولپنڈی اور ملتان میں ٹیسٹ جیتا اور کراچی میں پاکستان کو ہرایا۔پاکستان کرکٹ ٹیم کو ہوم گرائونڈ پر 70 سال میں پہلی مرتبہ انگلینڈ نے ٹیسٹ سیریز میں وائٹ واش کیا۔