بانی تحریک انصاف کی حکومت اعظم خان چلا رہے تھے، پرویز خٹک

 پشاور(این این آئی)پی ٹی آئی پارلیمنٹرین کے چیئرمین پرویز خٹک نے کہا ہے کہ بانی تحریک انصاف کی حکومت اعظم خان چلا رہے تھے۔اپنے ایک بیان میں پرویز خٹک نے کہا کہ اعظم خان ہی پنجاب، خیبرپختونخوا، گلگت بلتستان میں آئی جیز اور چیف سیکریٹریز لگاتے تھے جس بیوروکریٹ کو اختیارات دیے آج وہی وعدہ معاف گواہ بن گیا، اعظم خان کی وجہ سے پی ٹی آئی کو نقصان ہوا۔انہوں نے کہا کہ عثمان بزدار پی ٹی آئی میں تھا ہی نہیں، وہ آزاد حیثیت سے الیکشن جیتے تھے، عثمان بزدار کو وزیراعلیٰ بنانے کی بانی پی ٹی آئی کی منطق سمجھ نہیں آئی تھی، ان کو وزارتِ اعلیٰ پنجاب کے لیے ایسا بندہ چاہیے تھا جو ہاں میں ہاں ملائے، عثمان بزدار نے چار سال میں پنجاب کا بیڑا غرق کیا۔پرویز خٹک نے کہا کہ بانی پی ٹی آئی کسے آرمی چیف بنانا چاہتے تھے مجھے معلوم نہیں، آرمی چیف کون ہوگا اس کا فیصلہ بانی پی ٹی آئی نے نہیں کرنا تھا، فوج کا اپنا طریقہ کار ہے جوسب سے سینئر تھے وہ آرمی چیف بن گئے۔انہوںنے کہاکہ جس کے پاس اچھے امیدوار ہوں گے حکومت اسی کی آئے گی۔