لاہور (نمائندہ سپورٹس+سپورٹس رپورٹر ) پاکستان کی طویل بادشاہت کا خاتمہ، آسٹریلیا دنیا کی نمبر ون ٹی ٹونٹی ٹیم بن گئی۔ پاکستان 754 روز تک پہلی پوزیشن پر براجمان رہا۔آئی سی سی ٹی ٹونٹی رینکنگ میں آسٹریلیا پاکستان سے صرف ایک پوائنٹ کی دوری پر تھا، تاہم اب اس کے پوائنٹس کی تعداد زیادہ ہو گئی ہے، ٹی ٹوئنٹی رینکنگ پر پاکستان کی 2 سالہ طویل بادشاہت ختم ہو گئی۔ پاکستانی کرکٹ ٹیم مسلسل 754 روز تک آئی سی سی کی ٹی ٹونٹی رینکنگ میں نمبر 1 پوزیشن پر براجمان رہی۔ آج تک اتنے طویل عرصے کیلئے کوئی دوسری ٹیم نمبر 1 پوزیشن پر براجمان نہیں رہی۔ پاکستان کیلئے سال 2019 ٹی ٹونٹی کرکٹ کے حوالے سے خاصا مایوس کن رہا تھا، پھر بھی پاکستان کے زیادہ پوائنٹس نے اسے نمبر 1 رینکنگ سے محروم ہونے سے بچائے رکھا۔ تاہم اب آسٹریلیا نے ٹی ٹونٹی میچز میں مسلسل فتوحات حاصل کر کے رینکنگ میں پاکستان کی بادشاہت بالآخر ختم کر دی ہے۔