ساجد سدپارہ نے والد کے ساتھ آخری دشوار ترین رات کی ویڈیو جاری کر دی

پشاور (نوائے وقت رپورٹ) کے ٹو پر لاپتا ہونے والے پاکستانی کوہ پیما علی سدپارہ کے بیٹے ساجد سدپارا نے اپنے والد کے ساتھ آخری دشوار ترین رات کی ویڈیو جاری کر دی ہے۔ ساجد علی سدپارا نے ٹوئٹر پر جاری ویڈیو کے کیپشن میں لکھا کہ ٹیم اور میرے والد کے ساتھ آخری اور میری زندگی کی دشوار ترین رات۔ ویڈیو میں دیکھا جا سکتا ہے کہ کوہ پیما ساجد سدپارا اور علی سدپارہ ٹیم کے ہمراہ بیس کیمپ میں موجود ہیں۔ ویڈیو شیئر کرنے کے ساتھ ساتھ ساجد علی سدپارہ نے صارفین کو جعلی اکاؤنٹ کو فالو کرنے سے بھی خبردار کیا اور کہا کہ ان کی ویڈیوز جعلی اکاؤنٹ سے شیئر کی جا رہی ہیں جو سراسر غلط فعل ہے۔  محمد علی سدپارہ اور غیر ملکی کوہ پیما کی تلاش کے لیے پاک فوج اور دیگر اداروں نے ریسکیو آپریشن بھی کیا لیکن کوہ پیماؤں کا کچھ پتا نہیں چل سکا۔