لاہور: وزیر اعلیٰ پنجاب عثمان کا کہنا ہے کہ سینیٹ الیکشن میں حکومتی اتحاد کے امیدوار کامیاب ہوں گے۔ اپوزیشن صرف شور مچانا جانتی ہے۔ عوام کی خدمت کرنا ان کے پاس سے بھی نہیں گزرا۔
تفصیلات کے مطابق سینیٹ الیکشن میں حکومت امیدواروں کی کامیابی کے لیے وزیراعلیٰ پنجاب عثمان بزدار متحرک ہوگئے۔ وزیراعلیٰ عثمان بزدارنے پارٹی اور اتحادی جماعت مسلم لیگ (ق) کے امیدواروں سے سینیٹ انتخابات اور لائحہ عمل پر تفصیلی مشاورت کی۔ وزیراعلیٰ پنجاب نے کہا کہ پنجاب میں تحریک انصاف اورمسلم لیگ(ق) کے امیدوار وں کو کامیاب کرایا جائے گا۔ امیدواروں اور اراکین اسمبلی گروپس کے مابین بہترین کوآرڈینیشن یقینی بنائیں گے۔
دوسری جانب وزیراعظم کے معاون خصوصی ڈاکٹر شہبازگل نے وزیر اعلیٰ پنجاب عثمان بزدارسے ملاقات کی۔ ملاقات میں باہمی دلچسپی کے امور، سیاسی صورتحال اورسینیٹ الیکشن پر تبادلہ خیال کیا گیا۔
اس موقع پر وزیر اعلیٰ پنجاب نے کہا کہ اپوزیشن کا ریاست مخالف بیانیہ دم توڑ چکا ہے۔ اپوزیشن عناصر صرف پراپیگنڈا کی سیاست پر زندہ ہیں۔ اڑھائی برس میں پنجاب کو ترقی کی راہ پر لے کر گئے ہیں۔ ہماری ترجیح انسانی وسائل کی پائیدار ترقی ہے۔