اسلام آباد (خبر نگار خصوصی) کمانڈر سری لنکن بحریہ، وائس ایڈمرل نشانتھا اولوگیٹن نے نیول ہیڈکوارٹرز اسلام آباد کا دورہ کیا اور چیف آف دی نیول سٹاف ایڈمرل محمد امجد خان نیازی سے نیول ہیڈکوارٹرز اسلام آباد میں ملاقات کی۔ نیول ہیڈکوارٹرز آمد پر نیول چیف نے کمانڈر سری لنکن نیوی کا استقبال کیا اور انہیں گارڈ آف آنر پیش کیا گیا۔ یادگار شہداء پر پھولوں کی چادر چڑھانے کے بعد معزز مہمان کا نیول ہیڈکوارٹرز میں پرنسپل سٹاف آفیسرز سے تعارف کروایا گیا۔  بعد ازاں، کمانڈر سری لنکن نیوی نے چیف آف دی نیول سٹاف سے ملاقات کی۔ ملاقات میں باہمی دلچسپی کے امور بشمول دوطرفہ تعاون اور علاقائی سلامتی کے امور پر تبادلہ خیال کیا گیا۔ نیول چیف نے ریجنل میری ٹائم سکیورٹی پٹرولز کے ذریعے خطے میں بحری سکیورٹی اور امن کو یقینی بنانے کے لیے پاک بحریہ کے اقدامات پر روشنی ڈالی۔ معزز مہمان نے خطے میں مشترکہ بحری سکیورٹی کو برقرار رکھنے میں پاک بحریہ کی کوششوں اور عزائم کو سراہا۔