اسلام آباد (اے پی پی) پی سی بی کے زیراہتمام فیصل بینک پینٹینگولرکپ میں پنجاب اور فیڈرل ایریاز کے درمیان چار روزہ میچ ڈرا ہوگیا۔ پنجاب کوپہلی اننگز میں سبقت حاصل کرنے پر تین پوائنٹس مل گئے۔ ڈائمنڈ کرکٹ گراونڈ اسلام آباد میں چار روزہ میچ کے آخری روز فیڈرل ایریاز نے گزشتہ روز کے سکور اپنی دوسری اننگز 8 وکٹوں کے نقصان پر 259رنز پر ڈیکلیئر کردی اور پنجاب کو میچ جیتنے کیلئے 257 رنز کا ہدف دیا۔ پنجاب کی ٹیم نے اپنی دوسری اننگز میں آخری روز کھیل کے اختتام تک چار وکٹوں کے نقصان پر 77رنزبنائے ۔ فیڈرل ایریاز کی طرف سے سعد الطاف نے 3 اور سہیل تنویر نے ایک وکٹ حاصل کی۔ اس سے قبل فیڈرل ایریاز نے اپنی پہلی اننگز میں 223 رنز بنائے تھے ۔ جواب میں پنجاب کی ٹیم نے 226رنز سکور کیں اورپہلی اننگز میں تین رنز کی برتری حاصل کرلی۔