لاہور (سپورٹس رپورٹر) پاکستان کرکٹ بورڈ کے زیراہتمام جاری قائداعظم ٹرافی ٹورنامنٹ کے پانچویں مرحلہ میں راولپنڈی اور حیدرآباد ریجن کی ٹیموں نے اپنے اپنے میچز جیت لئے جبکہ پشاور اور ملتان سنٹرز میں کھیلے جانے والے دونوں میچ ہار جیت کے فیصلے کے بغیر ختم ہو گئے۔ تفصیلات کے مطابق میرپور سٹیڈیم آزاد جموں کشمیر میں کھیلے جانے والے میچ میں راولپنڈی کی ٹیم نے لاہور شالیمار کو 24 رنز سے مات دی۔ نیاز سٹیڈیم حیدرآباد میں کھیلے جانے والے میچ میں میزبان ٹیم نے بہاولپور ریجن کو اننگز اور 146 رنز سے ہرایا۔ ملتان کرکٹ سٹیڈیم ملتان میں کراچی بلیوز اور ملتان کی ٹیموں کے درمیان میچ بغیر کسی فیصلے کے ختم ہو گیا اسی طرح ارباب نیاز سٹیڈیم پشاور میں سیالکوٹ اور میزبان پشاور کی ٹیموں کے درمیان میچ کا بھی فیصلہ نہ ہو سکا۔