لاہور (سپورٹس رپورٹر+ نمائندہ سپورٹس) چیئرمین پی سی بی شہریار خان نے محمد عامرکی ناقص کارکردگی کا دفاع کرتے ہوئے کہاکہ عامر پانچ سال بعد انٹرنیشنل کرکٹ میں واپس آیا، اسے ایڈجسٹ ہونے میں وقت لگے گا۔ قذافی سٹیڈیم میں میڈیا غیر رسمی گفتگو کرتے ہوئے چیئرمین پی سی بی نے کہاکہ محمد عامر لمبے عرصے بعد کرکٹ میں واپس آئے ہیں اور ان کی واپسی سے اچھی کارکردگی توقعات لگالینا مناسب نہیں ہے۔ پانچ برس بعد کرکٹ میں واپس آنے کے بعد عامر کو ایڈجسٹ ہونے میں وقت لگے گا۔ چیئرمین نے قومی ٹیم کی ناقص کارکردگی کا بھی دفاع کرتے ہوئے کہا کہ شاہد آفریدی سمیت تمام کھلاڑیوں نے نیوزی لینڈ کیخلاف اچھی کرکٹ کھیلنے کیلئے بھرپور جان ماری لیکن میزبان ٹیم بائولنگ اور فیلڈنگ میں بازی لے گئی۔ شہریارخان نے تین میچز پر مشتمل ون ڈے سیریز میں قومی ٹیم کیلئے نیک خواہشات کا اظہار کیا۔