لاہور (نامہ نگار) بیدیاں روڈ پر پیراگون سوسائٹی میں شاپنگ مال میں قائم ریسٹورنٹ میں گیس سلنڈر پھٹنے سے 20سالہ نوجوان جاں بحق دو افراد معمولی زخمی ہو گئے۔ تفصیلات کے مطابق ڈیفنس کے قریب بیدیاں روڈ پر پیراگون سوسائٹی میں موجود امپوریم مال میں قائم اروما ریسٹورنٹ میں گزشتہ روز زور دار دھماکے سے گیس سلنڈر پھٹ گیا اور آگ بھڑک اٹھی۔ زد میں آ کر 20سالہ ملازم خرم شدید زخمی دو افراد معمولی زخمی ہو گئے۔ دھماکے سے شاپنگ مال میں شدید خوف و ہراس پھیل گیا۔ اطلاع ملنے پر امدادی ٹیمیں موقع پر پہنچ گئیں۔ امدای ٹیموں نے دو معمولی زخمی افراد کو طبی امداد کے بعد فارغ کر دیا، زخمی خرم کو تشویشناک حالت میں ہسپتال منتقل کردیا گیا۔ جہاں وہ زخموں کی تاب نہ لاتے ہوئے دم توڑ گیا۔