ایڈمرل امجد نیازی کی سعودی چیف آف جنرل سٹاف‘ کمانڈر رائل نیول فورسز سے ملاقاتیں

اسلام آباد (سٹاف رپورٹر) چیف آف دی نیول سٹاف ایڈمرل محمد امجد خان نیازی نے دورہ سعودی عرب کے موقع پر  سعودی چیف آف جنرل سٹاف اور کمانڈر رائل سعودی نیول فورسز سے ملاقاتیں کیں۔ رائل سعودی نیول فورسز کے ہیڈکوارٹرز ریاض آمد پر کمانڈر رائل سعودی نیول فورسز وائس ایڈمرل فہد بن عبد اللہ الغفیلی نے سربراہ پاک بحریہ کا استقبال کیا۔ سعودی نیول فورسز کے چاق و چوبند دستے نے سربراہ پاک بحریہ کو گارڈ آف آنر پیش کیا۔ امیرالبحر نے رائل سعودی نیول فورسز کے کمانڈ اینڈ کنٹرول سینٹر کا دورہ بھی کیا جہاں انہیں سعودی بحری فوج کے جاری آپریشنز پر بریفنگ دی گئی۔ بعدازاں امیر البحر نے چیف آف جنرل سٹاف جنرل فیاض بن حامد الرویلی اور کمانڈر رائل سعودی نیول فورسز وائس ایڈمرل فہد بن عبد اللہ الغفیلی سے الگ الگ ملاقاتیں کیں۔ ملاقاتوں کے دوران باہمی دلچسپی اور دوطرفہ دفاعی امور پر تبادلہ خیال کیا گیا۔ سعودی حکام نے پاکستان اور سعودی عرب کے مابین برادرانہ تعلقات اور خطے میں امن و استحکام کو برقرار رکھنے کے لئے پاکستان کی جانب سے کیے جانے والے اقدامات کو سراہا۔ علاوہ ازیں رائل سعودی نیول فورسز کی صلاحیت میں اضافے اور عسکری تربیت میں پاک بحریہ کے کردار کی بھی تعریف کی گئی۔ یہ دورہ دونوں ممالک کے درمیان باہمی تعاون کو بالعموم اور بحری تعاون کو بالخصوص فروغ دینے میں کلیدی کردار ادا کرے گا۔