سیلابی پانی میں پھنسے 55 افراد کو بچالیا ،13 کی شناخت کرلی گئی
ایرانی صوبے فارس میں سیلاب سے 17 افراد جاں بحق اور6 لاپتہ ہوگئے گئے۔ غیرملکی خبررساں ادارے کے مطابق ایران کے صوبے فارس کے شہر استھبان میں شدید بارشوں کے سبب سیلابی صورتحال کا سامنا ہے۔ سیلاب سے اب تک 17 افراد جاں بحق ہوچکے ہیں جن میں سے 13 کی شناخت کرلی گئی جبکہ سیلابی ریلے میں پھنسے 6 افراد اب بھی لاپتہ ہیں۔گورنر یوسف کاریگر کے جاری کردہ بیان کے مطابق موسلادھار بارشوں کے باعث استھبان میں سیلابی صورتحال ہے۔انہوں نے کہا کہ دریا کے کنارے بڑے پیمانے پر آباد کاریوں اور تعمیرات کے باعث سیلاب کے خطرات بڑھ گئے ۔انہوں نے کہا کہ ریسکیو ٹیموں نے سیلابی پانی میں پھنسے 55 افراد کو بچالیاجبکہ 6 لاپتہ افراد کی تلاش کیلئے ریسکیو آپریشن جاری ہے۔ایرانی محکمہ موسمیات نے پہلے ہی موسمیاتی تبدیلیوں کے باعث ملک بھر میں شدید بارشوں کی پیشگوئی کر رکھی تھی۔